- 276 -

1372. Nov. 29. Liegnitz.

Herzog Ludwig erlaubt der Stadt Liegnitz, die von Boleslaus, Wenzel und ihm verkauften, auf der Stadt haftenden Zinsen wiederzukaufen oder zu anderweitigem Wiederkauf umzuschreiben.

Wir Lodwig von gots gnadin herczog in Slezien. herre czum Brege, vormunde der irluchtin fürstin Ruprechts, Wenczlaus, Bonczlaus vnd Heynrichs, gebrüdir ouch herczogin in Slezien, herren czu Legnicz vnd czum Goltberge, vnsirn libin vettirn, bekennen offentlich yn dysem brife allen den, dy yn sehen adir hoerin lezen, daz wir durch vnsirs vnd vnsir stat Legnicz nuczes vnd vromen willen derlewbit habin vnd derleubin vnsern getrewen ratmannen czu Legnicz, dy nv synt vnd allen den, dy noch yn an den rat der stat Legnicz gekorn werdin yn czukumftigen cziten, daz sy allen dy czins, dy dy irluchtin furstin vnsir vatter herczog Bonczlaw vnd vnsvr brudir herczoge Wenczslaw, eyns seligen gedechtnusse, vnd auch wir vnd vnser vorgnanten vettir vormals vf dy vorbenante stat Legnicz vorkouft habin, gancz adir eynteil wechseln mögin vnd sullin yn sulchir geschycht, daz sy dy den selbe czinse den lewtin, den sy vormals vorkouft syn, wo dy syn, widir abekoufin vnde abeloezin moegin, wen sy des stat habin, vnd mogin dy noch yrem vnd eldisten rate vnd gewissen andirn leutin vorkoufen, wem sy czu rate werdin, so sy yz vnsir stad Legnicz der egnantin allir beste dunket, bekomen, vnschedelich doch vnsirn vettirn der abelozunge, dy sy dor ynne gehabin mochtin adir habin, vnd bekennen auch, waz sy czinse vormals abegekouft vnd gelost habin vnd dy gewechselt habin nach der forme, alz vorgeschrebin stet, daz das auch vnsir wort sy vnd volkumen wille vnd globin sy dor vmme nymmir vordenken noch an gesprechin; dez czu bestettegunge habin wir desin briff gegebin vorsigilt mit vnsir egnantir vettern ingesigil czu Legnicz czu synthe Andrevs obende nach gots geburt driczehenhundirt iare yn dem czwey vnd sybenczegisten iore, do by synt gewest vnsir getrewen her Tycze von Czedelicz, her Otto von Czedelicz, her Hannus von Schellendorf, rittere, Heinrich von Rechenberg, Dythrich von Redirn, Leuther von Schellendorf vnd her Thomas vnsir schriber, dem diser briff bevolen wart.

O. d. St L. No. 127. An Schnüren von grüner und rother Seide das gemeinschaftliche Siegel. — Bitschens Privilegb. f. CXXXb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866